Site Overlay

A instantánea, por Ledicia Costas

No campo de refuxiados de Idomeni, 14 000 persoas
loitan por sobrevivir no inferno

A INSTANTÁNEA
Na fronteira entre Grecia e Macedonia, nun lugar chamado Idomeni, unha nai ten ben agarrado o seu fillo. Colleuno por detrás e rodeouno cos seus brazos. Non quere mancalo, pero tampouco pode permitir que se mova.
Vai frío detrás do arame. É un frío interior e desproporcionado que conxela as arterias e os órganos. Só poden sentilo os que están dese lado.
—Que vas facer con iso? —pregúntalle o cativo ao seu pai, que o mira en fite sostendo unha coitela de afeitar.
O pequeno sábeo ben. Sabe que lle van rapar o pelo como fixeron con tantos outros nenos do campamento nos últimos días. Mais el non é coma os demais. El ten o pelo longo. Deixouno medrar á mantenta, para ver se así deixaban de chamarlle Orellas. Odia o seu alcume. Tamén odia as coitelas de afeitar, o arame de espiño e os piollos que saltan de cabeza en cabeza. O seu pelo é un escudo protector. Sen el estará perdido.
—É polo teu ben, fillo —bisba o seu pai con tristura, sentindo unha punzada de xeo entre as costelas.
Dito isto, colle aire e empeza a rasurar a cabeza do pequeno, que berra e chora mentres as súas guedellas rubias caen ao chan cunha delicadeza demoledora.
—Ódiovos! —grita furioso, desgarrando as cordas vocais.
Esa palabra corre por todo o campamento e queda flotando no aire de xeito incómodo. Alí todos saben que o odio é o alimento dos condenados a fracasar.
Ao outro lado do arame, un fotógrafo retrata a escena. Mágoa que as palabras non aparezan nas fotografías, pensa con amargura. A súa instantánea sairá publicada nun xornal e percorrerá o mundo saltando de televisión en televisión. Orellas nunca chegará a sabelo. Moito mellor así. Non o aturaría.
Non, sen o seu pelo.
Ledicia Costas

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.

ACEPTAR
Aviso de cookies